As Nacións Unidas recoñecen a importancia da IA e o seu potencial transformador mundial

• O informe sobre Desenvolvemento Humano das Nacións Unidas expón os resultados dunha das maiores enquisas sobre IA a nivel mundial.
• Máis da metade da poboación ten a esperanza de que a IA servirá para mellorar as súas vidas.

A Coruña, 23 de maio de 2025 –. O Informe sobre o Desenvolvemento Humano que elabora anualmente o Programa das Nacións Unidas para o Desenvolvemento (PNUD) céntrase este ano na intelixencia artificial e no seu potencial para axudar a transformar as economías e as sociedades. Tamén analiza que decisións e medidas se poden tomar para que todos os países teñan a oportunidade de prosperar nun mundo con IA.

En canto ao propio Índice de Desenvolvementeo Humano (IDH) destácase  o contexto de estancamento xeral desde a pandemia da Covid-19; aínda que España mellorou a súa puntuación durante este período, pasando dun IDH de 0,901 en 2020 a 0,918. Ademais, é un dos países cunha maior penetración en habilidades relacionadas coa IA, ocupando o posto 12 a nivel mundial, e sitúase por diante doutros países da contorna como Francia no que respecta á atracción de talento en IA.

O informe presenta os resultados dunha das maiores enquisas de opinión pública sobre IA realizadas a nivel mundial nos últimos tres anos: máis de 21.000 persoas de 21 países e 36 idiomas foron enquisadas. Detállanse a continuación algúns datos relevantes:

• Aproximadamente dous terzos das persoas enquisadas esperan utilizar a intelixencia artificial na educación, na saúde e no traballo durante o próximo ano.
• Máis da metade das persoas enquisadas teñen esperanza de que a IA servirá para mellorar as súas vidas.
• Os homes usan a IA máis que as mulleres. As persoas cun maior nivel educativo úsana en maior proporción ca aquelas con menor formación. A idade tamén inflúe: as persoas maiores senten que a IA podería reducir o seu sentido de autonomía.

En relación co ámbito laboral, o avance da IA xera temores sobre a perda masiva de empregos, segundo o informe. Non obstante, o panorama é optimista, segundo os datos da enquisa:

• A metade das persoas enquisadas a nivel mundial cre que os seus empregos poderían automatizarse.
• Seis de cada dez esperan que a IA teña un impacto positivo no seu emprego, creando novos postos e oportunidades.
• O 13% cre que a IA podería provocar perdas de emprego; e só unha de cada oito persoas cre que a IA podería quitarlles o seu posto de traballo.
• A utilización no traballo da IA xenerativa está a aumentar de maneira máis rápida que o uso de computadoras ou da internet.

Aínda que é indubidable que haberá cambios na demanda laboral, o informe afirma que delegar tarefas ás máquinas pode liberar ás persoas para dedicar máis tempo a outros aspectos da vida, como o traballo creativo, o coidado de pacientes, a educación ou a aprendizaxe e desenvolvemento de novas habilidades; tarefas nas que as máquinas son deficientes e o compoñente humano é, por si mesmo, valioso.

Ademais, a IA pode mellorar a capacidade industrial e conducir a unha maior diversificación das cadeas de valor, así como a mellores mercados para os traballadores por conta propia. Pode xerar novos coñecementos e competencias en beneficio de todas as persoas, desde os agricultores ata os pequenos empresarios. E creará novas funcións para os seres humanos de formas que aínda non podemos imaxinar.

No marco do Regulamento Europeo de Intelixencia Artificial e das liñas de traballo da Axencia Española de Supervisión de Intelixencia Artificial (AESIA), merece especial mención enfoque polo que avoga o informe: unha IA centrada no ser humano. Para iso, identifícanse tres áreas de actuación:

1. Construír unha economía “complementaria” para que as persoas colaboren coa IA no canto de competir con ela. A mellora da intelixencia humana, o empoderamento dos traballadores e o despregamento estratéxico da IA son claves.
2. Impulsar a innovación con propósito, integrando a acción humana en todo o ciclo de vida da IA, desde o deseño ata a implementación.
3. Investir en capacidades relevantes para que as persoas poidan aproveitar ao máximo a IA nas súas vidas, atendendo aos riscos e preocupacións relacionadas cos prexuízos, a privacidade, a accesibilidade e a equidade.

En conxunto, estas tres áreas convidan os responsables políticos a tomar decisións e decidir como utilizar a IA para crear oportunidades que permitan facer fronte ao cambio climático, os conflitos, á migración masiva e o rápido aumento das desigualdades.

Finalmente, o informe tamén convida á reflexión ao afirmar que os riscos son só unha parte da cuestión; a intelixencia artificial ofrece moitas máis posibilidades para o ben común, e aproveitalas para satisfacer as expectativas das persoas dunha vida mellor depende de algo máis que de algoritmos: é unha cuestión de decisións.

Na seguinte ligazón pódese consultar o informe completo:

A Matter of Choices - United Nations Development Programme