"Continente de IA"

A Unión Europea puxo en marcha este mes de abril o Plan de Acción “Continente de IA”, co obxectivo de ocupar a posición de líder mundial en intelixencia artificial (IA). A finalidade desta ambiciosa iniciativa é transformar as grandes industrias tradicionais europeas e os seus activos de talento en motores de innovación e aceleración da IA. Para iso, este Plan de Acción artéllase ao redor de cinco piares fundamentais:

1. Construción dunha infraestrutura informática e de datos de IA a gran escala: a través de factorías IA, trece delas xa están en proceso de implantación, para dar apoio ás empresas emerxentes, á industria do sector e aos investigadores da UE no desenvolvemento de modelos e aplicacións de IA. A UE tamén contribuirá á creación de ata cinco gigafactorías de IA en distintos puntos da Unión. Ademais, a Comisión proporá unha Lei para o desenvolvemento da computación na nube e da IA, co obxectivo, cando menos, de triplicar a capacidade dos centros de datos da UE nos vindeiros 5 a 7 anos, dando prioridade aos centros de datos altamente sostibles.

2. Aumento do acceso a grandes volumes de datos de alta calidade: o obxectivo deste piar é potenciar a innovación en IA, o que require o acceso a grandes volumes de datos de alta calidade. Para iso, prevese a creación de laboratorios de datos e, xa en 2025, porase en marcha unha estratexia de datos da Unión para crear un mercado interior de datos que permita expandir as solucións de IA.

3. Desenvolvemento de algoritmos e fomento da adopción da IA en sectores estratéxicos da UE: a Comisión poñerá en marcha nos próximos meses a estratexia de uso da IA, co fin de desenvolver solucións adaptadas aos distintos usos e impulsar a súa utilización industrial e a súa plena adopción nos sectores público e privado estratéxicos da UE.

4. Reforzo das capacidades e do talento en materia de IA: iniciativas como a Reserva de Talentos, a acción Marie Sklodowska-Curie e os programas de bolsas sobre IA contribuirán á apertura de vías de migración legal para persoas traballadoras altamente cualificadas e atraerán cara Europa aos mellores investigadores e expertas/os europeos en intelixencia artificial. Ademais, a Comisión desenvolverá programas educativos e formativos sobre IA e IA xerativa en sectores clave.

5. Simplificación regulatoria: o Regulamento de Intelixencia Artificial aumenta a confianza da cidadanía na tecnoloxía e proporciona aos investidores e emprendedores a seguridade xurídica necesaria para expandir a súa actividade e implantar a IA en toda Europa. Ademais, a Comisión poñerá en marcha un servizo de asistencia sobre o Regulamento de IA que axudará ás empresas a cumprilo.

Pode consultar o Plan de Acción na seguinte ligazón: The AI Continent Action Plan