A AESIA lanza unha campaña para un Nadal en boa compañÍA

• A Axencia Española de Supervisión de Intelixencia Artificial (AESIA) pon en marcha unha campaña en redes e a través da súa web con consellos prácticos sobre IA.

• Os xoguetes, as compras, as viaxes e a intelixencia artificial son os eixos centrais das publicacións que se difundirán estes días​​​​​​​.

A Coruña, 17 de decembro de 2025 –. A Axencia Española de Supervisión de Intelixencia Artificial (AESIA) lanza unha campaña con consellos e recomendacións sobre intelixencia artificial e xoguetes, compras e viaxes para acompañar á cidadanía para tomar decisións informadas nas súas compras do Nadal; así como para concienciar tamén sobre os beneficios e riscos desta tecnoloxía tan transformadora e omnipresente.

A campaña enmárcase dentro das funcións de alfabetización en IA da Axencia, que teñen como obxectivo a sensibilización e formación nesta tecnoloxía a toda a sociedade. O slogan: “Este Nadal, en boa compañÍA” non só evoca a familia, as amizades, os reencontros; senón tamén a intelixencia artificial como parte xa da vida diaria de todas as persoas; unha compañía moitas veces invisible, que non senta á mesa, pero que está presente cando se elixen xoguetes, fanse compras en liña ou se planifican viaxes; recomendando, analizando e aprendendo dos hábitos de consumidores e consumidoras.

O obxectivo é ofrecer recomendacións e consellos sobre como usar a IA de forma segura e responsable, como pode axudar e que riscos convén ter en conta. A campaña estrutúrase en tres breves capítulos conformados por pequenos textos, infografías e vídeos curtos, que se irán publicando ao longo dos próximos días na web e nas redes sociais da AESIA.

O primeiro dos capítulos aborda o papel da intelixencia artificial nos xoguetes, en que aspectos fixarse á hora de elixilos para que sexan seguros e transparentes. O segundo, céntrase nas compras en liña a través dunha serie de recomendacións para facer un uso consciente e informado da IA. Finalmente, o terceiro capítulo, recolle varios consellos prácticos á hora de buscar e contratar unha viaxe ou unha escapada: onde está a IA?

Desde a AESIA convídase a toda a cidadanía a gozar desta tecnoloxía con confianza, pero tamén con coñecemento e responsabilidade.

¡Felices Festas!